THE AULD “WAGGITY-WA”
The auld waggity-wa has stoppit at last,
Its lood ting-a-ling’s noo a thing o’ the past;
Winter and simmer, autumn and spring,
It aye gar’d us jump when it started to ring.
When the hoose wis a’ dark, the street covered wi’ snaw,
We aye could depend on the auld waggity-wa’.
The auld waggity-wa played its part well –
It aye had us up a wee ‘fore the bell;
Morn, noon, an’ nicht, healthy or sick,
We aye could hear its cheerie bit tick.
Noo it’s awa’, an’ up near the brace
Another bit nock hangs in its place
The auld waggity-wa, tho’ it ne’er was a beauty,
It aye was exact performing its duty;
It kep’ a guid haud o’ gay-hearted wooers –
It gar’d them tak tent an’ keep elders’ hoors.
Noo its wheels are a’ gyte, an’ the pendulum’s broke,
An’ we hear the lood tick o’ a new-fashioned clock
