WHEN OOR ACCOUNTS ARE SQUARE
We needna fret nor pine awa,
Tho’ frien’s are deid and gane;
Tho’ in a garret near the sky
We noo maun live oor lane.
Tho’ wild and eerie is the nicht,
Oor herts wi’ grief are sare,
We shall a’ be welcome hame
When oor accounts are square.
We needna fret nor pine awa,
Tho’ hard oor lot in life,
Tho’ no sae fit tae stan’ oor ain
Nor battle in the strife.
Tho’ in the back hauf o’ the day
Oor auld coat’s maist threadbare,
We shall a’ be welcome hame
When oor accounts are square.
We needna fret nor pine awa’,
Tho’ trudging doon the brae,
Tho’ oor tousie pow’s turning bauld,
Oor beard is showing grey.
Tho’ fortune’s smiles a’ pass us bye
And leaves oor pooches bare,
We shall a’ be welcome hame
When oor accounts are square.
